Flora & Ginger結婚典禮

今日係Flora同Ginger結婚嘅大喜日子，繼上次幫Louis個仔嘅婚宴做司儀後，今次再有機會擔任結婚典禮嘅司儀，而拍檔就係電子琴王子K.O.。

講起今早嘅氣温得十度以下，自己同Tommy大約十点半鐘出到紅磡都會廣場。同K.O.稍作溝通後，一眾親友亦相繼到場，過咗一陣結婚典禮就正式開始。當結婚進行曲奏起後，一對新人徐徐進場，然後雙方交換介指，跟住就到新娘同新郎講佢哋嘅感受，當然說話中少不免有感人嘅對白同場面。

其實人生能夠找到一個愛自己同自己愛嘅人，我哋作為佢哋嘅朋友都感到好開心，喺度祝福佢哋兩個白頭到老、永結同心，永遠幸福快樂。
 

港鐵動力繽紛Show(Day 2)

今日係演出嘅第二日，晨早七点半又要出發入亞博，不過有咗噚日嘅經驗，有好多地方都比較清楚，所以採排用嘅時間亦可以減少。

今日開心嘅事情除咗演出方面有進步之外，就係終於可以與克勤同Kelly合照。噚晚克勤做完港鐵個Show之後要趕去紅館參加港台十大中文金曲頒獎禮，今朝一早又要入亞博表演，一眼就知道佢真係好攰，所以話一個歌星越忙就越紅，但相對要付出嘅心力真係唔少。而Kelly個個都話佢靚女，這点相信無人會反對。佢兩個每人唱咗四首歌，我哋同噚日一樣做佢哋嘅粉絲，不過今次就更加專業，每個歡呼聲同打拍子聲都好有節拍，當然MTR螢光風扇都唔少得，佢兩個都話我哋係全場最High嘅一羣。

港台DJ羅啓新今日同咗我哋喺機楊食午飯，佢個人好Nice，又健談，重同我哋分享咗好多佢對人生、事業同家庭嘅見解，我又攞咗佢嘅電話，話如果下次真係有機會上李志剛嘅節目錄音就Call佢食飯。

我哋這兩天都差不多用盡自己嘅小宇宙，有兩個同事都發病立刻要返屋企，Tommy都有D感冒，要早D休息啦。又Post住少少相上個Blog先。

有相 update！

港鐵動力繽紛Show(Day 1)

終於到咗演出嘅第一日，大家都好準時喺九龍塘站集合，專車入到亞博大約早上八点十五分。因為早場要開十点三十分，下午果場就開四点三十分，所以未食早餐已經要上台採排，時間關係亦只練咗兩次。

大約九点鐘行政總裁率領一眾高層、工作人員同我哋拜神，祈求表演成功，真係有D似開鏡一樣。跟住大會要我哋喺後台準備，而隔離就係所有表演者嘅房間，當然包括李克勤、陳慧琳、李思捷、楊崢同羅啓新，巨星週圍當然有好多保姆照顧。

當羅啓新講完佢嘅Talkshow之後就到我哋出場，而我同Tommy要扮演一對出席婚宴嘅情侶首先上台。唔知是不是溝通方面出咗問題，原來加咗一段「陪我長大」嘅廣告短片喺我哋演出嘅音樂之前而我哋全部人都唔知，因此我同Tommy當然比原定嘅時間早咗到位，幸好平時我哋都有演出嘅經驗，所以未致台下嘅觀眾察覺有錯。

今日嘅演出第二節比第一節好，我哋亦有機會同李思捷、楊崢同羅啓新合照，而當克勤落台唱歌時亦有幸同佢握手，我哋重做埋克勤同Kelly嘅粉絲一路同佢哋打拍子，不過最可惜就係今日未有機會同佢兩個合照，希望明天有機會啦。今日又Post住少少相上個Blog先。

有新相啦！