「Sing Sing 相惜」第一屆西貢將軍澳區青年歌唱比賽初賽評判及表演

好榮幸今日可以同Tommy擔任「Sing Sing 相惜」第一屆西貢將軍澳區青年歌唱比賽初賽嘅評判，比賽喺將軍澳香島中學舉行，亦係我哋上年攞到將軍澳區流行曲歌唱比賽亞軍嘅參賽地方。我哋大約十二点左右到達，食咗少少嘢之後就行去比賽場地。

今日除咗我哋之外，另外重有兩位評判，其中一位是黄穎寧歌唱老師，而另一位係為是次歌唱比賽主唱主題曲嘅郭竹怡小姐，評分方面我哋會以參賽者嘅歌唱技巧、個人風格和節奏感等領域給予評分。

比賽喺一点十五分左右開始，分兩節進行，參賽嘅單位一共有五十六個，對象全是十三至二十歲嘅青少年，當中亦不乏唱得好好嘅朋友，而我哋要喺當中選出十位進入決賽。其實今日嘅分數都相當接近，不過入到決賽嘅都係我哋四位評判嘅心水，佢哋年紀輕輕重有好多進步嘅空間。

當所有參賽者唱完之後，就到我同Tommy上台表演，我獨唱咗「世上只有」，再同Tommy合唱咗「十分、愛」。自己對今日獨唱方面嘅演出唔滿意，而合唱就還可以啦。之後就到黄老師上台簡述今日參賽者嘅表現，而大會亦分別致送紀念品俾我哋。

最後，我哋真係非常多謝大會嘅邀請，特別係今次活動嘅籌備工作小組成員，包括主席同兩位副主席等等，尤其是Matthew嘅親切招待，在此希望大會於將軍澳中心搞嘅決賽順順利利，各參賽者有超水準嘅表現。