「Sing Sing 相惜」第一屆西貢將軍澳區青年歌唱比賽初賽評判及表演

好榮幸今日可以同Tommy擔任「Sing Sing 相惜」第一屆西貢將軍澳區青年歌唱比賽初賽嘅評判，比賽喺將軍澳香島中學舉行，亦係我哋上年攞到將軍澳區流行曲歌唱比賽亞軍嘅參賽地方。我哋大約十二点左右到達，食咗少少嘢之後就行去比賽場地。

今日除咗我哋之外，另外重有兩位評判，其中一位是黄穎寧歌唱老師，而另一位係為是次歌唱比賽主唱主題曲嘅郭竹怡小姐，評分方面我哋會以參賽者嘅歌唱技巧、個人風格和節奏感等領域給予評分。

比賽喺一点十五分左右開始，分兩節進行，參賽嘅單位一共有五十六個，對象全是十三至二十歲嘅青少年，當中亦不乏唱得好好嘅朋友，而我哋要喺當中選出十位進入決賽。其實今日嘅分數都相當接近，不過入到決賽嘅都係我哋四位評判嘅心水，佢哋年紀輕輕重有好多進步嘅空間。

當所有參賽者唱完之後，就到我同Tommy上台表演，我獨唱咗「世上只有」，再同Tommy合唱咗「十分、愛」。自己對今日獨唱方面嘅演出唔滿意，而合唱就還可以啦。之後就到黄老師上台簡述今日參賽者嘅表現，而大會亦分別致送紀念品俾我哋。

最後，我哋真係非常多謝大會嘅邀請，特別係今次活動嘅籌備工作小組成員，包括主席同兩位副主席等等，尤其是Matthew嘅親切招待，在此希望大會於將軍澳中心搞嘅決賽順順利利，各參賽者有超水準嘅表現。

港鐵康樂會歌唱大賽2008初賽+Stanley仔仔婚宴表演嘉賓

今日係兩鐵合併後第一次搞嘅歌唱比賽，雖然自己無份參加，但亦有去九龍灣為Tommy打氣。比賽喺上午十点鐘開始，而參賽人數大約有六十人，當中會揀十二至十五人入決賽，成績會喺二十一号公報。港鐵公司今年請咗著名樂評人馮禮慈先生、填詞人水本純先生同前滾石樂隊主音歌手張武孝先生(大AL)做評判，今次如果入到決賽，就可以在八月十五号喺牛池灣文娛中心比賽。

比賽完之後自己就返咗屋企，因為晚上重要幫Stanley仔仔嘅婚宴做表演嘉賓，而Tommy就要過堅尼地城參加由聖安多尼堂主辦嘅「第二屆明日之星流行曲歌唱比賽」成人組初賽。至於自己就首次同Amy以合唱形式參加公開組比賽，而公開組嘅初賽就遲一日(二十号)先舉行。

講番今晚嘅婚宴喺紅磡海逸酒店宴會廳舉行，由於Stanley一家係基督徒，所以我同Tommy特別揀咗「愛是不保留」嘅婚禮版 「我信愛是恒久」送俾一對新人，而今次嘅表演係以Live形式用綱琴同結他合作嘅演出，之前亦只係夾過兩次，效果尚算滿意。

最後重有一件好高興嘅事，就係收到某歌唱比賽主辦單位嘅邀請，去擔任這個比賽的評判，實在太榮幸有這個機會，現在正同活動籌備工作小組嘅人員跟進緊詳情，遲D如果真係成事先上Blog啦！
 

地鐵攝影會會員作品展

自己一向對攝影都好有興趣，所以之前就加入咗地鐵攝影會，希望可以提高自己攝影方面嘅水平。而今日係攝影會會員作品展嘅開幕典禮，一連三日喺尖沙咀文化中心展出會員嘅作品。自己大約四点鐘左右到達會場，喺未開始典禮之前，當然要參觀一下展出嘅作品偷下師啦。

大會今年邀請到香港中華攝影會會長吳連城先生、恩典攝影學會榮譽會長鍾賜佳先生同攝影名家張淑歡小姐到場為今次嘅展會做開幕典禮嘅嘉賓，而自己就負責一個好簡單嘅任務，就係帶領剪采嘉賓進場。雖然只係一個少少嘅任務，但大會亦頒發咗一個紀念品俾自己，真係好開心呀！

典禮大約喺晚上七点半鐘完成，跟住就同嘉賓及攝影會嘅會友一齊去食飯。因為明天一早要去九龍灣為Tommy打氣，明晚又要幫Stanley仔仔嘅婚宴做表演嘉賓，所以到九点鐘左右自己就走先，不過自己今日的確學識咗好多攝影方面的知識。
 

兒童綜合表演在鰂魚涌公園+行際羽毛球大賽2008(個人賽)

已經有三個多月無幫Denis做表演，噚日就去咗鰂魚涌公園為康文署搞嘅活動唱歌。由於交通方面出了点問題，我哋要飛的過去，又撞正交更時間，好唔容易先上到架的士，到達場地時已經五点鐘，好彩都無過鐘，因為我哋知道每一次表演，準時係一件必要嘅事。

不過噚日係咁多次表演中自己覺得最差嘅一次，可能因為康文署嘅工作人員話我哋揀嘅歌唔多適合小朋友，但其實Bonnie第一part已經唱咗六首兒歌，而佢亦話過我哋唔需要一定揀兒歌，因為之前同類嘅演出亦沒有這麼嚴緊，最後我哋都唱哂五首歌，不過自己都覺得唔合格，又算是一次經驗吧！

表演過後就去咗聖安多尼堂報名參加「明日之星」歌唱比賽，亦係今年報嘅第一個比賽。之後又去咗探Tommy家姐個女，因為佢剛剛誕下一個新生命，我哋返到屋企亦已經差不多十二点鐘。

今朝一早又去咗睇行際羽毛球大賽2008(個人賽)，今年係合併後第一次用「港鐵」個名參加比賽，而抽簽結果就好壞參半。我哋報咗四項比賽，上午打完後女雙就打入四強，所以一定有盃攞，男雙亦入八強，要睇下午嘅成績。男單就最唔好彩，八強已經要對上年冠軍，温雙亦喺八強以總局數二比一敗北，下個星期重有團体賽，希望到時會有更好嘅成績。