慈民邨聖誕嘉年華2008

今日去咗慈雲山慈民邨表演唱歌，大家約咗喺黄大仙港鐵站會合，同隊Crew飲完茶之後就行去表演場地。天文台話今日會落雨，果然節目開始之前就落住微微雨，表演台同嘉賓席都要立刻蓋上上蓋，情況的確有点狼狽。

大會嘅開幕同致辭儀式比預期遲咗差不多半句鐘，而我係第一個出場嘅歌手，一首「We wish you a Merry Christmas」配合住聖誕老人喺台下派禮物，帶動住全場嘅氣氛，小朋友們都玩得興高采烈。唱多兩首歌之後，Tommy就上台同我合唱，我哋揀嘅舊歌又甚得老人家歡心，有位小妹妹点唱「上海灘」，小小年紀竟然喜歡聽這首歌。

其實今日歌手方面重有同佢第一次合作嘅Fanny，佢已經同Denis合作咗三年，當然亦係唱得之人。當Tommy唱完兩首獨唱歌之後，Denis就提議同Tommy合唱「上海灘」來滿足剛才那位小妹妹嘅要求。

節目接近尾聲，Denis、Bonnie、Tommy同我再合唱一首「Jingle Bells」，為今日嘅演出寫上完美句号。雖然今日d雨時大時細，但在場嘅觀眾仍不時報以掌聲作鼓勵，我哋亦非常享受今日嘅演出。

康雅歡樂迎聖誕嘉年華2008

聖誕通常係出show旺季，噚晚同Tommy去咗藍田康雅宛，自己做司儀而Tommy就唱歌。喺APM食咗少少嘢之後就到表演場地，再到屋宛寫子樓跟負責人了解整晚嘅節目安排。晚會有雜技表演、抽獎同唱歌，包括流行曲同粵曲，另外又請咗李紫昕(Purple姐姐)到場獻唱金曲。

嘉年華會喺立案法團主席致詞後正式開始，第一個出場唱歌嘅係Spencer，噚晚Mandy都有同佢一齊來。好耐無見過Mandy，現在佢哋已經係人哋嘅Daddy同Mummy，祝佢哋嘅小寶貝快高長大，集佢哋兩個有一把美好嘅嗓子。

節目進行得比預期快，到Tommy出場嘅時間快咗成十分鐘，所以Tommy喺唱聖誕歌嘅時候就叫埋一班小朋友上台搞搞氣氛，再加埋最後我哋兩個再唱番首合唱歌來配合番Purple姐姐到場嘅時間。大家都知Purple姐姐唱兒歌了得，另外佢搞氣氛亦有一手，我哋從佢嘅演出當中都獲益良多。

噚晚已經掌握咗更多做好司儀嘅技巧，不過連續兩晚出show的確有点辛苦。
 

比華利山聖誕嘉年華2008

今年聖誕第二份工作係噚晚喺跑馬地比華利山做聖誕嘉年華會嘅司儀，約埋Celia大約七点鐘喺銅鑼灣會合，然後一齊行去會場。會場嘅佈置非常有聖誕氣氛，高尚住宅資源方面當然唔成問題。

噚晚嘅氣温應該得十二、三度，加上會場喺室外，所以有風吹來時都幾凍。今次好多謝Celia特登抽時間來為我拍video，自己日後可以睇番自己嘅表現，有不足嘅地方可以改善。

簡單go through咗個programme之後，嘉年華會準時喺八点鐘開始，節目包括有Hip Hot舞表演、厨師雜技同牧童笛表演，當然攤位遊戲，聖誕老人派禮物同幸運大抽獎一定唔少得，唯獨就無歌唱表演。整晚節目都進行得好順利，嘉年華會亦喺十点鐘結束，之後同咗Celia食咗少少嘢先返屋企，返到去已經一点幾鐘，好攰！

回顧整晚嘅表現自己覺得opening應該可以做得好d，其他地方亦有進步嘅空間。最後好多謝Celia同Stephen一班工作人員嘅提点，大家合作得好開心。

今晚平安夜，祝所有blog友聖誕快樂！

新界國際聯青社良朋匯聚迎銀禧24週年社慶聯歡晚會

噚晚同Tommy入咗屯門黃金海岸遊艇會為新界國際聯青社良朋匯聚迎銀禧24週年社慶聯歡晚會表演，因為地點比較遠，所以我哋都早咗到達，趁有時間就喺遊艇會裡面影下相。

今年黃金海岸都掛滿燈飾，入夜後加添咗唔少聖誕嘅氣氛。晚宴場地喺遊艇會二樓嘅Function Room，大會聯絡人話整晚節目嘅安排都好隨意，除咗一d指定要做嘅儀式例如致辭同頒贈紀念品之外，我哋可以自由發揮，所以在未開席前我哋已經唱咗三首歌，到上菜時大約八点四十分左右就正式表演，整晚唱咗十多首歌，大部份都係經典金曲。

我哋離開時已經差不多十点鐘，因為今日重要返工，所以無多逗留，不過回家時已經好攰啦。

「結核病之過去、現在、未來」研討會晚宴

上星期五晚出席咗香港防癆心臟及胸病協會六十週年晚宴，今晚再去佢哋嘅「結核病之過去、現在、未來」研討會晚宴做表演嘉賓，地点就喺深水灣香港高爾夫球會。

今年係防癆會成立六十週年，所以由年頭開始會方已經舉辦咗好多活動。今晚嘅嘉賓都係來自各世界各地對癆病好有研究嘅醫學界人仕，而由於大部份嘅嘉賓都係外藉人仕，所以我哋今晚特別揀嘅兩首歌當中，其中一首係英文歌「Top of the world」，這首歌既輕快又多外藉人仕識唱同鍾意，係一首非常配合今晚主題嘅歌，多謝Celia提供寶貴嘅意見俾我哋。

晚宴喺大約九点半就完結，可能因為深灣始終離市區較遠，不過大會亦特別安排咗專車送我哋同其他嘉賓返金鐘同銅鑼灣，非常周到。

今晚又再次滿載而歸啦，有銀包、4GB手指、朱古力、鮑魚麵等等......，而最值得紀念嘅係由防癆會主席 Mr. Edwin C.C. Leung, MBE 頒發兩套六十週年紀念郵票連首日封俾我哋留念。今晚嘅表現自己都算滿意，希望好快又有相聚嘅機會啦！

香港防癆心臟及胸病協會六十週年晚宴

今晚真係一個非常難忘嘅晚上，事關我同Tommy好榮幸應邀出席香港防癆心臟及胸病協會六十週年晚宴，地点喺香港君悅酒店宴會廳，而主禮嘉賓包括香港特別行政區政府行政長官曾蔭權先生、食物及衛生局局長周一嶽先生、香港防癆心臟及胸病協會董事局主席梁仲清先生及一眾董事局成員。

我哋大約五点鐘左右到達酒店，大會預先安排我哋綵排嘅時間係五点至五点半鐘，不過因為之前場地有活動而令酒店遲咗交場，而今次我哋唱嘅三首歌當中其中兩首係要用鋼琴伴奏，所以實際可以同琴師練習嘅時間唔多，初時真係有d緊張，不過酒店嘅音嚮 - 正！

其實大會今晚重請咗香港天才綱琴神童，現年只得十一歲嘅沈靖韜小朋友表演，年紀輕輕嘅佢之前已經喺本港同外地獲獎無數。另外，蘇珊小姐亦係表演歌手之一，佢同我哋綵排嘅時間差不多，佢試完音之後到就輪到我哋，所以只打過招呼而無緣合照，不過Denis應該同佢幾熟，下次重有機會踫面。

大約七点十五分鐘，嘉賓亦已陸續到場，包括有教育局局長孫明揚先生、前律政司司長梁愛詩女仕、衛生署署長林秉恩醫生、醫管局主席胡定旭先生，以及好多來自廣東省、上海市同外地嘅官員同貴賓。這時大會司儀叫大家起立，光線開始轉暗，隨着銀樂隊奏起音樂，特首曾蔭權先生等嘉賓亦相繼進場，場面莊嚴而隆重，而晚宴亦正式開始。

當所有嘉賓致辭完畢後，我哋就唱生日歌而一眾嘉賓就上台切蛋糕及祝酒，期間我哋隻mic無聲，所以生日歌前部份只得音樂，酒店職員溝通上應該要改善。席間有抽獎而今晚我哋真係滿載而歸。節目接近尾聲，我哋係最後表演嘅單位，要帶領各嘉賓唱出防癆主題曲同英文歌「Congratulations」，演出都算不過不失。

今晚真係好好好開心同好好好興奮呀！最後祝防癆會六十週年新日快樂！Happy Brithday ！