兒童綜合表演在景峰

Tommy同我今晚入咗屯門景峰花園幫 Denis做表演，這個活動由康文署主辦，節目方面包括有唱歌、遊戲、雜技同魔術，自己就負責部份唱歌嘅環節。

至於今晚嘅司儀Bonnie，佢係一個好有經驗嘅前輩，Denis特登叫佢帶住Tommy，希望藉此可以讓 Tommy吸收同掌握多D司儀方面嘅經驗同技巧。始終今次係 Tommy嘅處子登場，當然有 D緊張，所以亦提早到場同 Bonnie 夾下整個流程。

表演如期喺八点鐘開始，首先由Tommy做 Opening，介紹一下今晚嘅節目，跟住就請 Bonnie出場，Bonnie唱咗幾首兒歌之後，又同 D小朋友玩下遊戲，相信這就是兒童節目嘅指定環節。跟住 Tommy又介紹另一位表演者，佢就係有「超級廚師」之稱嘅雜技師 (Louis)，佢嘅演出的確係又精彩、又鬼馬，在場嘅小朋友都睇到拍爛手掌。

好快又到自己出場，原先嘅安排係首先唱 Twins 嘅「愛情當入樽 + 二人世界盃」，再唱多兩隻童謠，最後同 Tommy夾多隻合唱，為配合快歌嘅舞步，其實係小兒科果隻，Denis特登安排咗一套 Headset俾我，点知成晚最出人意表嘅事情就喺我同 D小朋友唱完 Twins嘅「愛情當入樽 + 二人世界盃」最後嘅一句發生，登登登登！全場無電！ 工作人員立刻走去電錶箱檢查，佢哋又打電話俾有關人仕協助，等咗十五分鐘仍然無辦法修理好，最後決定只好將餘下嘅節目腰斬，Denis話之前從未試過因為停電而要腰斬節目，唔通真係自己唱爆咪！

總結今晚嘅經驗，重要練多D吾同類形嘅歌，要練舞同練氣。Tommy方面就要加強臨場嘅應變能力，同埋與台下觀眾互動嘅技巧。

明晚重要參加馬鞍山盃歌唱比賽嘅初賽，諗落都好耐無比賽，都係要早D休息啦。