In-House 歌唱比賽

今日係一年一度嘅 In-house歌唱比賽，自己同Tommy係攪手之餘重做埋司儀，所以一早就要去打点一切。

記得以前自己係參賽者嘅時候，比賽前總係有D緊張，自從上年開始再玩公開比賽之後，吸收到嘅經驗的確對我哋日後嘅演出同比賽好有幫助；回想真係要多謝鍾偉明先生，佢係全港十九區歌唱大賽嘅冠軍人馬，上年Tommy請咗佢做評判，亦係佢鼓勵我哋多參加這類比賽。

今年應該係九鐵最後一年嘅歌唱比賽，Tommy特別為今次嘅比賽命名為「王者之Sing」卡拉OK歌唱比賽，由邀請評判到出 Notice 通知各同事同去揀獎盃等嘅事，全部由Tommy同自己安排。

評判團方面，好高興邀請到新城娛樂台DJ瑪姫(Maggie)，作曲人馮家俊同歌唱導師陳銘基擔任。Maggie剛剛回歸新城，佢以往曾經奪得多項歌唱比賽嘅冠軍，同時亦擔任過好多唔同大小function嘅司儀，今日當然要向佢偷下師啦；馮家俊係一位創作歌手，亦曾為多位藝人作曲；而陳銘基亦係之前獲獎無數嘅歌手，現時已經係一位專業嘅歌唱導師，有佢哋做評判真係為今日嘅比賽生色不少。

今日自己唱「隆重登場」做 Opening，氣氛都唔錯，同時有咗上年嘅經驗，今日嘅比賽都算順利，而自己同 Tommy 嘅表現亦算唔錯。最後要多謝有份幫手嘅同事同朋友包括 Mandy、 阿Kim、卓子、Ginger 同阿 Paul等等。今晚就 post 住幾張相先，遲D先再 post 埋其他相上個 Blog。

兩鐵合併後新公司「港鐵」嘅歌唱比賽又會係怎樣？好期待！

下個星期Denis約咗我哋食飯，佢話下個月又有個活動要演出，要我哋準備一下，除咗唱歌部份，佢都希望今次Tommy同我其中一個跟進埋司儀個部份，雖然今次已經有司儀擔正，但可以吸收下經驗。今次嘅對象好似係小朋友多，又要揀定歌啦。