紅白歌唱大賽2007決賽

今日過咗去筲箕灣愛秩序灣社區會堂參加紅白歌唱大賽2007決賽，今年係第十六屆，亦係第一次open to 教會以外嘅人，自己大約三点幾去到綵排，今次嘅主題係Get High，所以唔似一般嘅比賽，大會希望每一個到場嘅朋友都能夠盡興，而全場四佰幾人真係好似開party一樣，三個幾鐘絕無悶場，氣氛亦好high。

今晚大會請咗高皓正、鄧婉玲同Eternity Girls做評判同表演嘉賓，教會朋友嘅Opening演出非常精彩，相信之前一定排練咗好多次。

為咗配合今晚嘅主題，所有參賽者嘅dress code，男嘅必須要白色，女嘅當然要係紅色。參賽名單方面，獨唱五個，合唱九隊，樂隊就有兩隊，而參賽歌曲方面就包羅萬有，除咗有流行曲、重有好多教會嘅歌，更加有用粵曲填上教會歌詞嘅參賽歌，又有以話劇做opening嘅歌曲，你話係唔係一個另類嘅歌唱比賽。

至於表演嘉賓方面，高皓正嘅演出，同佢個名一樣 '正'！佢亦有好多friends到場。Eternity Girls嘅筷子姊妹花同Twins嘅造型亦相當鬼馬。鄧婉玲(Mimi)嘅歌聲亦十分甜美。

到最後我哋雖然攞唔到獎，但係亦享受咗一個非常開心嘅晚上。重有要恭喜輝洪，佢嘅Blessing又再次為佢帶來另一次冠軍。另外亦要多謝Ginger同佢女友捧場。