「Firework」無毒新一代唱作比賽決賽暨頒獎禮

早前提過Tommy嘅作品獲得這個比賽的最佳填詞獎，噚晚就去咗禮頓山社區會堂出席這次頒獎禮。其實噚晚亦係演唱組決賽嘅日子，大會之前從二百多個參賽單位中揀選十二個進入決賽，而當中自己認識嘅就有鬼仔、Samuel、守基，Spencer同一一。

我哋應該係第一批到達現場綵排嘅參賽者，但見大會只用場地本身的音嚮設備，完全無法滿足一個歌唱比賽嘅基本要求，自己已經替演唱組擔心，果然跟着舉行比賽時大部份參賽者都失準，這点主辦單位日後必須注意。

當演唱組兩節嘅比賽完結後，大會就宣報創作組得獎名單。今次創作組作品嘅評判係著名音樂人楊鎮邦先生，佢嘅作品「愛得太遲」相信好多朋友都認識，Tommy亦好榮幸從佢嘅手上接過獎項。話說我哋同佢都好有緣份，記得兩鐵合併前公司揾咗李克勤唱合併主題曲，我哋上去宇宙大爆炸音樂製作室錄音時，就是由佢負責那個項目，今次就攞埋佢個e-mail address，方便日後聯絡。

頒獎完畢之後就由創作組得獎者演繹自己嘅作品，Tommy都唱得唔錯，而台下反應亦相當好。至於演唱組方面，結果由守基兄奪冠，鬼仔哋三兄弟獲得亞軍，恭喜哂！

其實今次Tommy得獎已經好開心，另一件開心事係其中一位評判賽後邀請Tommy同曾經替楊千樺作「狼來了」嘅音樂人合作，幫一間醫院製作一隻內有十首歌嘅紀念大碟，時限一年，類似題材要填十首歌，真係好有挑戰性呀！最後大家交換咗電話，但Tommy現在還是戰戰兢兢。