東京伊豆賞櫻之旅 (Part 3) + 生日快樂

Day 5 (25 March 09) - 最後一天嘅行程係去參觀台場一帶嘅地方，包括自由女神像，遠眺出名日劇景点「彩虹橋」，不過我相信晚上嘅夜景一定較白天美麗。此外，附近亦係日本富士電視台嘅所在地。

台場 shopping 嘅地方都唔少，包括有 Decks，主要由 Sea Side Mall 同 Island Mall 組成，當中有 SEGA 的 Joypolis 室內遊戲機中心，台場一丁目商店街、筋肉擂台改成的 Muscle Park 室內遊樂場、以及富有香港特色嘅台場小香港等等。

之後我哋返回 Palette Town 食午飯，港幣大約八元一碟嘅壽司，超抵！！！食完之後我哋就行 Venus Fort 廣場，裡面是仿照古老歐洲街道而建，天花板上係藍色嘅天空，而且會隨時間轉變成黃昏及夜晚，十分美麗。Venus Fort 對面係豐田自動車展示中心，係車迷必到嘅地方。

終於都到咗旅程嘅尾聲，大家都懷着依依不捨嘅心情返香港，希望好快我哋又可以重返這個地方。

寫這篇網誌的今天是自己的生日， Happy Brithday to me !!!!!!

東京伊豆賞櫻之旅 (Part 2)

Day 4 (24 March 09) - 第四天係自由活動，部份團友去咗新宿、上野同淺草等購物熱點繼續掃貨，而我哋就揀咗去東京迪士尼樂園，適逢係樂園25週年紀念，所以一定唔可以錯過今次嘅機會。

早上用咗十分鐘喺酒店食咗個早餐，匆匆乘搭酒店安排嘅巴士出發去樂園，去到差不多七点四十分，距離開門嘅時間還有十五分鐘。由於係當地學校假期，樂園已經有好多人排隊準備入場。同香港迪士尼比較，日本迪士尼嘅氣氛相對熱閙得多，日本人好享受箇中嘅樂趣。

為咗喺有限嘅時間玩最多嘅遊戲同睇最多嘅表演，之前已經計劃好要行嘅路線，攞快證當然亦係其中一個辦法。為慶祝25週年，樂園的確加咗好多心思喺佈置方面，下午同晚上嘅花車巡遊非常精彩，兩者比較以後者更值得欣賞，但煙花發放嘅時間比較短。

由早上八点玩到晚上九点半，有得玩有得 shop，勁開心，最後抱着疲倦嘅步伐乘 JR 返酒店。(最好玩同最開心嘅一日，下次有機會要去埋 Disney Sea)

東京伊豆賞櫻之旅 (Part 1)

已經有一段時間無出外旅遊，趁復活節假期前同 Tommy 約埋一班好友到東京伊豆賞櫻：-

Day 1 (21 March 09) - 早上六点半到達香港赤鱲角國際機場，乘機到日本成田機場已經係當地時間下午四点半，再到成田購物中心 shopping + 食晚飯，最後到附近酒店 check-in。(無特別驚喜)
 

Day 2 (22 March 09) - 喺酒店食過早餐之後，首先出發去參觀東京灣海上螢火蟲大橋展望台，超大風、又大浪，加上有微雨，勁凍！！！跟住再到富士五湖之一嘅河口湖食午飯，再到熱海梅園賞梅，途中開始落大雨，晚上住宿温泉酒店，食温泉料理及享受傳统日式露天風呂。(天氣差，無梅賞，好彩重有露天風呂)

Day 3 (23 March 09) - 早上出發到箱根國立公園蘆之湖，乘世紀海盜船遊覽湖上風光，之後到伊豆高原賞櫻，再到日本戰國時代小田園城跡參觀，晚上到銀座食日式燒烤餐同 shopping，是晚住宿台場有明華盛頓酒店。(只有小量櫻花，同心目中有一段距離，有点失望)