「結核病之過去、現在、未來」研討會晚宴

上星期五晚出席咗香港防癆心臟及胸病協會六十週年晚宴，今晚再去佢哋嘅「結核病之過去、現在、未來」研討會晚宴做表演嘉賓，地点就喺深水灣香港高爾夫球會。

今年係防癆會成立六十週年，所以由年頭開始會方已經舉辦咗好多活動。今晚嘅嘉賓都係來自各世界各地對癆病好有研究嘅醫學界人仕，而由於大部份嘅嘉賓都係外藉人仕，所以我哋今晚特別揀嘅兩首歌當中，其中一首係英文歌「Top of the world」，這首歌既輕快又多外藉人仕識唱同鍾意，係一首非常配合今晚主題嘅歌，多謝Celia提供寶貴嘅意見俾我哋。

晚宴喺大約九点半就完結，可能因為深灣始終離市區較遠，不過大會亦特別安排咗專車送我哋同其他嘉賓返金鐘同銅鑼灣，非常周到。

今晚又再次滿載而歸啦，有銀包、4GB手指、朱古力、鮑魚麵等等......，而最值得紀念嘅係由防癆會主席 Mr. Edwin C.C. Leung, MBE 頒發兩套六十週年紀念郵票連首日封俾我哋留念。今晚嘅表現自己都算滿意，希望好快又有相聚嘅機會啦！

香港防癆心臟及胸病協會六十週年晚宴

今晚真係一個非常難忘嘅晚上，事關我同Tommy好榮幸應邀出席香港防癆心臟及胸病協會六十週年晚宴，地点喺香港君悅酒店宴會廳，而主禮嘉賓包括香港特別行政區政府行政長官曾蔭權先生、食物及衛生局局長周一嶽先生、香港防癆心臟及胸病協會董事局主席梁仲清先生及一眾董事局成員。

我哋大約五点鐘左右到達酒店，大會預先安排我哋綵排嘅時間係五点至五点半鐘，不過因為之前場地有活動而令酒店遲咗交場，而今次我哋唱嘅三首歌當中其中兩首係要用鋼琴伴奏，所以實際可以同琴師練習嘅時間唔多，初時真係有d緊張，不過酒店嘅音嚮 - 正！

其實大會今晚重請咗香港天才綱琴神童，現年只得十一歲嘅沈靖韜小朋友表演，年紀輕輕嘅佢之前已經喺本港同外地獲獎無數。另外，蘇珊小姐亦係表演歌手之一，佢同我哋綵排嘅時間差不多，佢試完音之後到就輪到我哋，所以只打過招呼而無緣合照，不過Denis應該同佢幾熟，下次重有機會踫面。

大約七点十五分鐘，嘉賓亦已陸續到場，包括有教育局局長孫明揚先生、前律政司司長梁愛詩女仕、衛生署署長林秉恩醫生、醫管局主席胡定旭先生，以及好多來自廣東省、上海市同外地嘅官員同貴賓。這時大會司儀叫大家起立，光線開始轉暗，隨着銀樂隊奏起音樂，特首曾蔭權先生等嘉賓亦相繼進場，場面莊嚴而隆重，而晚宴亦正式開始。

當所有嘉賓致辭完畢後，我哋就唱生日歌而一眾嘉賓就上台切蛋糕及祝酒，期間我哋隻mic無聲，所以生日歌前部份只得音樂，酒店職員溝通上應該要改善。席間有抽獎而今晚我哋真係滿載而歸。節目接近尾聲，我哋係最後表演嘅單位，要帶領各嘉賓唱出防癆主題曲同英文歌「Congratulations」，演出都算不過不失。

今晚真係好好好開心同好好好興奮呀！最後祝防癆會六十週年新日快樂！Happy Brithday ！

「唱好奧運」舊曲新詞唱作比賽

雖然奧運已經完滿結束，但由觀塘民聯會主辦嘅「唱好奧運」舊曲新詞唱作比賽就喺今日舉行，這個比賽嘅宗旨係想提高市民對奧運精神嘅認識，並宣揚奧林匹克運動會團結友誼、公平競爭及永不言敗嘅奮鬥訊息，而一向對填詞有興趣嘅我哋當然亦有報名參加。

今日比賽嘅地点喺荼果嶺麗港城茜草灣社區中心，我哋跟大會指定嘅時間到達。致於參賽歌曲歌名叫「同一個夢」，正正用咗今年北京奧運嘅口号：「同一個天空、同一個夢想」做構思。今次比賽評分準則以歌曲內容跟主題是否配合為重，佔70%，而歌曲演繹只佔30%。

其實每次唱作比賽自己覺得最難嘅就係背歌詞，尤其自己唔係填詞嘅一個，所以好容易會跟原唱歌曲混淆，加上這兩個星期開始咳，近兩日重咳多咗，能夠唱完成首歌都算是合格，雖然最後我哋都無攞到獎項，但都不失為一次好好嘅經驗。

我哋唱完之後原來大會繼續有活動，就係觀塘區歌唱比賽複賽，喺出面見到好多唱得之人包括Celia，原來佢今年都有份參加今次嘅比賽，最後祝佢順利進入決賽，同時獲得美滿嘅成績。

婚宴司儀 (Mabel & Patrick)

中秋節過後，自己一邊要交功課應付考試，另外就去咗幾個婚宴，觀摩一下Celia同Stanley兩位前輩点樣 handle一個完美嘅婚宴，因為Celia嘅工作室除咗有接歌唱表演嘅function之外，同時亦有幫人安排籌備婚宴活動。其實自己除咗唱歌之外，對司儀方面亦感興趣，而婚禮嘅宴會上可以有機會睇到好多靚人靚衫，又可以接觸到update嘅化妝潮流，作為一個女性嘅我當然樂意接受這份工作。

經過之前幾次嘅現場觀察同學習後，基本上一個婚宴嘅流程亦已了解，前晚喺Mable同Patrick嘅婚宴上，Celia就將其中一個遊戲環節交俾我同Stanley去主持，遊戲大約玩咗二十分鐘左右，同Stanley第一次合作都算合拍。當晚整個婚宴一切尚算順利，同一眾工作人員亦合作愉快，希望好快又有合作嘅機會，最後自己亦祝一對新人「百年好合、永結同心！」

另外有一件好開心嘅事，就係收到香港防癆心臟及胸病協會嘅請柬，邀請我同Tommy去參加佢哋六十週年紀念晚宴，而我哋重有機會上台表演，而當晚嘅主禮嘉賓喺香港特別行政區政府行政長官曾蔭權先生，現在真係要積極練歌喇！