在百年老舖的最後一個工作天

寫咗Blog差不多半年，今日算是心情最複雜的日子。雖然12月2号先係香港鐵路有限公司正式成立嘅日子，但正式來講今日才算是自己最後於九廣鐵路公司返工的日子，百年老舖就此畫上一個句号，心裡面真係有D傷感，而且有D同事好快就要搬去九龍灣或其他地方工作，日後好可能要各散東西，心情真係百感交集。

為迎接新公司嘅成立，除咗12月2号零晨於尖東站有交接儀式外，所有非穿制服員工之前獲發一件T-Shirt，於今天返工時穿着，所以今日喺Office見到好多上身衣著一樣嘅同事。可能因為大家好想影番張相留念嘅關係，所以大堂同大樓出面有Logo嘅地方都有好多人影相。

無論如何，兩鐵合併已成事實，就將所有嘅回憶藏於心底，期待新公司有一個新開始，祝願所有好同事順順利利，真係好鬼老土！

近日於寫字樓都影咗D相，就Post上個Blog到留念啦！現在再將一D九鐵之前嘅紀念品、車票同獎盃都Post埋上個Blog到先。

著名音樂人張佳添先生

今日係Tommy部門嘅Annual Dinner，好榮幸請咗之前為兩鐵合併作咗首主題曲「邁進新里程」嘅著名音樂人張佳添先生蒞臨做表演嘉賓。原本今晚自己要去飲，不過点都要抽空見一見偶像。

Clayton個人好Nice，當佢知道我同Tommy係代表九鐵為佢作果首主題曲做和唱嘅時候，佢都讚我哋唱得好好，得到佢嘅讚賞，自己當然好開心啦。其實Clayton嘅作品真係多不勝數，而好多歌手亦有演繹過佢嘅作品，好似有古巨基、薛凱琪、鄭中基同容祖兒等等。見佢今日彈住個結他，氣定神閒就為我哋唱咗幾首歌，名師就係名師，又上咗一課。

Clayton唱完之後，就輪到佢剛剛簽咗嘅一隊組合「Vega」表演，其實這隊組合大大張嘅Poster就掛住喺海隧香港出口，兩男兩女，靚仔靚女，有觀眾緣。自己同Tommy好留心聽佢哋演繹咗幾首歌，而佢哋介紹自己所唱嘅歌曲風格係比較另類，應該係時下音樂與Classic嘅混合体，不過佢哋四個嘅聲線都各有所長，配合起來都非常之好聽。

因為今晚佢哋重有地方要去，所以唔能夠留多一D時間同我哋分享，不過我哋都影咗D相留念，希望下次重有機會同佢哋見面啦！

KCRC A&S Club Annual Dinner 2007 "終極嘉年華" (Day 2)

噚晚成兩点幾先休息，今日又要三点鐘去到龍堡酒店review番噚晚嘅演出，好彩一早就攞咗假，因為一連兩晚嘅演出真係幾攰。Day 2 邀請咗好多以前九鐵嘅同事同A&S Club嘅前會長參加，而主席田北晨亦喺坐上客，比起噚晚的確更加隆重。

今晚嘅司儀己經變咗係喬寶寶同瑪姬(Maggie)，但因為時間比噚晚緊迫，所以卡拉OK歌唱比賽優勝者就無份演出，而表演嘉賓方面除咗有雷安娜同陳浩德之外，又請咗另一位殘酷一叮嘅台主雙刀成哥潘振成。

自己今晚要唱陳慧琳嘅紙醉金迷，為咗配合番首歌，一早同Production House嘅Janice講請佢準備一套Headset，大背白羽毛裝飾同銀色高帽，盡量希望跟Kelly嘅服飾相若，表演過後自己都幾滿意今晚嘅演出。

跟住就到雙刀成哥出場，不過見到佢嘅演出真係有点吃力，可能同佢嘅表演要成日攞住把大刀舞來舞去唱歌有關，佢自己話喺殘酷一叮時最多都係唱分幾兩分鐘，無現時要完整唱曬三首歌咁長時間，這点亦值得我哋體諒。

至於陳浩德嘅演出亦有佢一貫嘅水準，而Tommy同雷安娜今晚嘅演出比噚晚更好，連雷安娜都讚佢嘅表現一晚比一晚好。今晚嘅氣氛真係好好，整個流程都非常順利，這点有賴兩位司儀都做得好好，特別係喬寶寶攪氣氛的確一流。

好快又到咗Dinner嘅尾聲，大家真係有D唔捨得。會後Janice就拉大隊叫所有表演嘉賓、司儀同我哋去食消夜，大家一路食一路談天說地，又講番頭先嘅演出，不過明天要返工，唯有忍着淚說一聲Goodbye，希望日後重有合作嘅機會。

今晚又影咗好多相，又Post住少少上個Blog先。好攰呀！

KCRC A&S Club Annual Dinner 2007 "終極嘉年華" (Day 1)

好快又到咗Annual Dinner嘅日子，今次係九鐵最後一年嘅餐舞會，一連兩晚喺龍堡酒店舉行，所以非常有紀念性，而自己同Tommy係籌委之一，當然要出一分力啦！

晚會以嘉年華會嘅形式做主題，Production House特登請咗幾個巴西女郎大跳森巴熱舞，佢哋嘅服飾真係非常性感、耀目同搶眼，好多同事都搶住同佢哋合照。

其實兩晚嘅節目同司儀都有D唔同，今晚嘅司儀同上年一樣都係李麗蕊。表演方面除咗有今年In-House卡拉OK歌唱比賽嘅亞軍同季軍演出之外，嘉賓就有雷安娜，陳浩德同殘酷一叮台主莫凱謙小朋友，喺化妝間見到佢哋，當然唔會放過機會同佢哋合照啦。

今晚自己無份演出，不過Tommy就好榮幸兩晚都有機會同雷安娜合唱「暫別」，佢哋兩個之前無夾過，只係喺開Show前叫做溝通過，到真正演出時嘅表現都算幾好啦，雷安娜重話Tommy有多少似黄耀明，引來台下一輪大笑，而我當然幫佢哋映咗好多相啦。

總結今晚嘅演出，有好多地方重要改善，遊戲時間太長，節目編排可以好D。今晚都影咗好多相，就Post住少少先，遲D再Update番上個Blog到。明晚重有Day 2嘅演出而自己都有份，都係要早D休息啦！