葵涌(西)分區日嘉年華

今日去咗葵興表演，活動叫做「葵涌(西)分區日嘉年華」，我哋大約二点鐘到達現場，大會主禮嘉賓正進行儀式。今次己經係我哋第三次幫Denis做類似嘅Function，亦開始慢慢習慣與台下嘅觀眾有交流。

本來今日我哋準備咗五首歌，分別係「難得有情人」、「梅蘭梅蘭我愛你」、「人在旅途灑淚時」、「十分.愛」同「當年情」，因為我哋知道這種場合舊歌會比較受歡迎，点知大會部機播唔到全部歌，最後剩係唱咗三首歌，不過因為這個原因，我同Tommy反而要喺台上講下嘢，又同台下嘅觀眾攪下氣氛，完全係唱歌以外嘅寶貴經驗，比起之前出Show已經自然同鎮定好多。

這個活動除咗我哋之外，大會重請咗方伊琪小姐做表演嘉賓，佢一向都唱開鄧麗君嘅歌，今次當然都唔例外，亦有前輩一貫嘅水準，我哋當然又同佢影番張相留念。

今個星期真係過得好充實，不過就好攰啦！
 

港鐵八鄉車廠Projects Division聖誔Party

噚晚贏咗平機會個創作比賽冠軍，懷住興奮嘅心情返到屋企已經差不多点幾鐘，今日一早又要去八鄉車廠Projects Division聖誔Party做MC。今次係新公司自己部門第一次嘅大型活動，到場人數大約都有八佰幾人，所以要喺車廠露天嘅地方舉行，因為地方夠大。

公司今次都揾咗Production House去籌備，而Janice嘅公司最後成功獲得港鐵嘅這份Job，真係要恭喜佢！而我今日嘅Partier係來自前地鐵嘅Lawrence同鬼馬叮王喬寶寶，同佢再見面真係份外開心，因為佢真係可以帶俾大家好多歡樂。

今次自己部門真係好有面子，因為可以請到行政總裁周松崗先生出席。而自己除咗做MC之外，今次又有機會同喬寶寶合唱一曲「現代愛情故事」，唔講都唔知佢竟然識唱這首歌！另外值得一提就係有位外藉老板，Mr. David Sorton，佢獻唱經典金曲「小李飛刀」同「上海灘」，台下嘅氣氛即時高漲到頂点。

可能因為噚晚唔夠休息嘅關係，今日嘅表現其實唔算好好，總括來說，自己都過咗一個好開心嘅一日。好攰呀！

唱出"平等"你、我、他/她唱作比賽決賽

終於到咗唱出"平等"你、我、他/她唱作歌唱比賽決賽嘅日子，講起這個比賽真係有点勞氣，事關主辦單位嘅安排真係幾混亂，提交咗嘅CD同歌詞要再交過，決賽前交咗嘅MD又話要用番CD。另外，本來大會安排參賽者四点鐘開始可以試音，不過當我哋五点鐘到達上環文娛中心時，發覺已經有好多參賽者在場等候，原來因為大會幫我哋準備嘅音樂未到，最終所有參賽者要到差不多六点半鐘先可以試音，有D參賽者就只係試得幾句，無奈！

正式比賽喺七点十五分開始，首先由學生組出場，佢哋個個都唱得唔錯。接住就喺新曲新詞組(公開組)，參賽嘅歌曲係從未發表過嘅作品，其中一首俾我嘅印象比較深刻，而佢哋亦攞到此組嘅冠軍。最後就到舊曲新詞組(公開組)，我同Tommy果組排第三，自己一開始就講錯嘢，誤將原曲「我的驕傲」講咗「世上只有」，連Tommy跟住講嘢都食螺絲，真失敗！不過經驗叫我哋一定要鎮定，幸好最後都可以完完整整演繹成首歌。

今次大會請咗前TVB音樂指導鄒立基先生，創作人林浩先生同平機會嘅代表何漢琛先生做評判，另外又請咗梁雨恩小姐(Cathy Leung)做表演嘉賓，佢都唱得幾好。

好快又到宣報結果嘅時侯，評判鄒立基先生話創作嘅作品真係要有自己嘅心思喺裡面，而今晚有D作品在填詞方面都太過跟原作相似，這点日後應要避免。當學生組同新曲新詞組都有結果後，最後就到舊曲新詞組，當評判宣報冠軍係Tommy嘅作品嘅時候，我哋都高興得擁抱起來，畢竟Tommy嘅作品繼上次強積金唱作比賽之後又再一次獲得認同。

今晚嘅心情由無奈到興奮，這種感覺好難去形容。大會話今次得獎嘅參賽者同佢嘅作品有機會會上香港電台「Made in HK李志剛」嘅節目作錄音轉播，Happy！

最後要多謝今晚來捧場嘅朋友，包括阿Kim、Denis、Alex同PC，另外亦要恭喜業業，佢都攞咗個最佳演繹獎，其他剛剛認識嘅參賽者亦都要繼續努力！

在百年老舖的最後一個工作天

寫咗Blog差不多半年，今日算是心情最複雜的日子。雖然12月2号先係香港鐵路有限公司正式成立嘅日子，但正式來講今日才算是自己最後於九廣鐵路公司返工的日子，百年老舖就此畫上一個句号，心裡面真係有D傷感，而且有D同事好快就要搬去九龍灣或其他地方工作，日後好可能要各散東西，心情真係百感交集。

為迎接新公司嘅成立，除咗12月2号零晨於尖東站有交接儀式外，所有非穿制服員工之前獲發一件T-Shirt，於今天返工時穿着，所以今日喺Office見到好多上身衣著一樣嘅同事。可能因為大家好想影番張相留念嘅關係，所以大堂同大樓出面有Logo嘅地方都有好多人影相。

無論如何，兩鐵合併已成事實，就將所有嘅回憶藏於心底，期待新公司有一個新開始，祝願所有好同事順順利利，真係好鬼老土！

近日於寫字樓都影咗D相，就Post上個Blog到留念啦！現在再將一D九鐵之前嘅紀念品、車票同獎盃都Post埋上個Blog到先。

著名音樂人張佳添先生

今日係Tommy部門嘅Annual Dinner，好榮幸請咗之前為兩鐵合併作咗首主題曲「邁進新里程」嘅著名音樂人張佳添先生蒞臨做表演嘉賓。原本今晚自己要去飲，不過点都要抽空見一見偶像。

Clayton個人好Nice，當佢知道我同Tommy係代表九鐵為佢作果首主題曲做和唱嘅時候，佢都讚我哋唱得好好，得到佢嘅讚賞，自己當然好開心啦。其實Clayton嘅作品真係多不勝數，而好多歌手亦有演繹過佢嘅作品，好似有古巨基、薛凱琪、鄭中基同容祖兒等等。見佢今日彈住個結他，氣定神閒就為我哋唱咗幾首歌，名師就係名師，又上咗一課。

Clayton唱完之後，就輪到佢剛剛簽咗嘅一隊組合「Vega」表演，其實這隊組合大大張嘅Poster就掛住喺海隧香港出口，兩男兩女，靚仔靚女，有觀眾緣。自己同Tommy好留心聽佢哋演繹咗幾首歌，而佢哋介紹自己所唱嘅歌曲風格係比較另類，應該係時下音樂與Classic嘅混合体，不過佢哋四個嘅聲線都各有所長，配合起來都非常之好聽。

因為今晚佢哋重有地方要去，所以唔能夠留多一D時間同我哋分享，不過我哋都影咗D相留念，希望下次重有機會同佢哋見面啦！

KCRC A&S Club Annual Dinner 2007 "終極嘉年華" (Day 2)

噚晚成兩点幾先休息，今日又要三点鐘去到龍堡酒店review番噚晚嘅演出，好彩一早就攞咗假，因為一連兩晚嘅演出真係幾攰。Day 2 邀請咗好多以前九鐵嘅同事同A&S Club嘅前會長參加，而主席田北晨亦喺坐上客，比起噚晚的確更加隆重。

今晚嘅司儀己經變咗係喬寶寶同瑪姬(Maggie)，但因為時間比噚晚緊迫，所以卡拉OK歌唱比賽優勝者就無份演出，而表演嘉賓方面除咗有雷安娜同陳浩德之外，又請咗另一位殘酷一叮嘅台主雙刀成哥潘振成。

自己今晚要唱陳慧琳嘅紙醉金迷，為咗配合番首歌，一早同Production House嘅Janice講請佢準備一套Headset，大背白羽毛裝飾同銀色高帽，盡量希望跟Kelly嘅服飾相若，表演過後自己都幾滿意今晚嘅演出。

跟住就到雙刀成哥出場，不過見到佢嘅演出真係有点吃力，可能同佢嘅表演要成日攞住把大刀舞來舞去唱歌有關，佢自己話喺殘酷一叮時最多都係唱分幾兩分鐘，無現時要完整唱曬三首歌咁長時間，這点亦值得我哋體諒。

至於陳浩德嘅演出亦有佢一貫嘅水準，而Tommy同雷安娜今晚嘅演出比噚晚更好，連雷安娜都讚佢嘅表現一晚比一晚好。今晚嘅氣氛真係好好，整個流程都非常順利，這点有賴兩位司儀都做得好好，特別係喬寶寶攪氣氛的確一流。

好快又到咗Dinner嘅尾聲，大家真係有D唔捨得。會後Janice就拉大隊叫所有表演嘉賓、司儀同我哋去食消夜，大家一路食一路談天說地，又講番頭先嘅演出，不過明天要返工，唯有忍着淚說一聲Goodbye，希望日後重有合作嘅機會。

今晚又影咗好多相，又Post住少少上個Blog先。好攰呀！