婚宴司儀 (Yoki & Colin)

第一次單獨以女司儀身份同 Stanley 合作，婚宴舉行嘅地点喺沙田馬場宴會廳，我哋大約七点鐘去到就立刻同負責人了解一下今晚嘅流程。認識過一對新人 Yoki & Colin 之後，發覺佢哋兩個都好 nice，場地方面嘅佈置好靚，音響亦相當好，這点對我哋好重要。

畢竟做婚宴司儀同其它表演唔同，而今晚開始嘅時候其實都有少少緊張，不過有經驗豐富嘅 Stanley 喺身邊提点，好快已經可以 handle 得到，整晚嘅氣氛都唔錯，當然玩遊戲嘅環節亦唔會缺少。晚宴大約喺十一点十五分完結，到場喺親友亦盡興而歸。

自己評價今晚嘅表現係比之前進步，但仍然有需要學習嘅地方。最後祝一對新人百年好合、永結同心！
 

彩輝村新春環保清潔嘉年華2009

二月十四情人節嘅今晚，我哋去咗彩輝村幫 Denis 演出，實行寓工作於娛樂。大約六点鐘去到彩虹港鐵站，本來諗住去到場地附近食少少嘢就開 show，点知原來附近係無嘢食，要搭番車落彩雲食快餐，然後又匆匆回去場地。

其實今晚嘅節目同之前嘅都大同小異，有唱歌、粵曲、中國舞同魔術表演，另外亦有攤位遊戲俾小朋友玩。司儀方面由阿謙擔任，而嘉賓就請咗「鄧英敏」先生，又係自上年中秋後再次見面。

我哋今晚唱咗五首歌，情人節當然以情歌為主，反應都唔錯。Denis 近幾個 show 都有粉墨登場唱番一兩隻歌，可能因為最近為慈善同「方伊琪」小姐翻唱「一樣的天空」做多d宣傳。

到咗節目嘅尾聲，我哋都請埋所有主禮嘉賓一齊唱番首「朋友」為今晚嘅演出譜上完美句号。最後，喺這個浪漫嘅情人節晚上，祝願所有有情人終成眷屬，未有情人就好快揾到另一半。

富昌邨元宵暨防火嘉年華2009

好快又去到牛年嘅年十三，今年第一份工作係為深水埗富昌邨元宵暨防火嘉年華唱歌，個場其實係之前超級女聲歌唱比賽初賽舉行嘅場地，我哋大約七点鐘去到，已經見到好多人喺度。

開幕儀式未開始之前，我同今日嘅司儀阿謙每人分別唱咗兩首歌。這個新朋友係滙豐 In-house 歌唱比賽冠軍，上星期 Denis介紹俾我哋認識嘅時候已經覺得好面善，原來佢上年代表滙豐參加行際歌唱大賽而我哋亦係坐上客，論年資阿謙幫 Denis 重耐過我哋，不過佢現在已經轉咗新工無喺滙豐工作喇。

今晚嘉年華嘅節目真係包羅萬有，除咗有流行曲、民歌、粵曲、拉丁舞同雜技等等嘅表演之外，另外 Denis 重請咗歐陽德勛同區耀國兩個做表演嘉賓。同歐陽德勛及阿謙都係第一次合作，而區耀國自從上年新年喺尖東同佢同台演出過之後，今晚亦再次碰面。

節目大約喺十点鐘完結，而我同 Tommy 就負責唱壓軸，我哋揀咗「歡樂年年」同「只有情永在」埋尾，新年加上接近元宵，台下嘅反應相當好。今晚對自己嘅表現都好滿意，此外又識到好多新朋友，意外收穫係收到台下觀眾嘅利事，開心。最後唔該阿謙幫我哋拍 Video，thanks !

希望今年所有演出同今晚一樣咁開心就好喇！