粉嶺欣盛苑中秋嘉年華2008

做咗幾晚中秋晚會，今日雖然係追月夜，但就日光日白去咗粉嶺欣盛苑為佢哋搞嘅中秋嘉年華唱歌。其實話明係中秋，理應唔多唔少都有d秋意，不過今年係有紀錄以來最熱嘅一個中秋節，令到一向怕熱嘅我在這個天氣下做户外表演份外辛苦。

我同Tommy大約四点鐘到達，之前喺安基苑做司儀時認識嘅Stephen已經在場，佢話俾我哋聽今日嘅音嚮可能會俾之前表演時嘅差，因為是主辦單位供應的，叫我哋唱歌時唔好離開個 panel 咁遠，以免有時有聲有時又無聲，好彩得到佢嘅提点，令到發生這個情况嘅機會減到最少。

今日台下嘅觀眾以小朋友居多，而我哋就一共唱咗六首歌，不過可能佢哋真係太細個，自己覺得佢哋都係鍾意睇雜技同搖搖表演多；演出完之後就回家，不過已經滿頭大汗了。

今年中秋假期都過得好充實好開心，不過幸福不是必然的，自己都覺得要珍惜眼前人，再祝大家「中秋節快樂」！
 

彩雲(二)邨「廢物源頭分類計劃」暨「中秋晚會」

中秋節好快來臨，而今晚就幫 Denise去咗彩雲(二)邨為這個屋邨主辦嘅「廢物源頭分類計劃」暨「中秋晚會」表演，六点鐘左右接埋Tommy就搭的士上去，因為時間尚早，所以我哋重有大把時間準備同影相。

節目喺大約七点十五分開始，主禮嘉賓包括有黄大仙區區議員，廉政公署中九龍社區關係處代表同屋邨互助委員會主席等等，佢哋一一致詞後就進行剪綵儀式。

自己覺得這個活動其實非常有意義，因為如果人人都自覺地支持將廢物源頭分類，相信一定對改善環境有幫助，而自己可以為今晚表演亦十分高興。

今晚除咗有唱歌、遊戲、舞蹈等等嘅表演之外，Denise重請咗有「屯門王子」之稱嘅「鄧英敏」先生到場助興，鬼馬嘅佢除咗唱咗幾首歌之外，重同d朋友玩遊戲，身為一位出色嘅綜合節目主持當然難唔到佢啦，自己亦好高興同佢影咗幾張相留念。

至於自己今晚同Tommy都唱咗四首歌，四首都係舊歌，OK啦。不過今晚真係好熱，天文台話今個中秋假期都會好熱，慘！因為重有戶外演出。

安基宛中秋晚會2008

今晚係自己第一次獨擔大旗做一個中秋晚會嘅司儀，亦係Celia第一次將整個job交俾自己去發揮，地点喺九龍灣安基宛，Thank you Celia 。節目雖然安排喺晚上八点鐘開始，但自己同Tommy六点鐘已到達，食咗少少嘢之後就提早到現場做好準備功夫。同安基宛業主立案法團主席同其他委員介紹過後，就開始 Go through 今晚嘅 Rundown。

原本天文台話會有雨，不過今晚天公造美，不但無雨，而且天氣亦唔算太熱。當主席同今晚嘅嘉賓( 秀茂坪警區警民關係組社區聯絡主任)致詞後，節目亦正式開始。其實今晚除咗有歌手獻唱金曲、魔術表演同攤位遊戲之外，最大特色係抽獎環節，因為整晚一共有一佰三十三份獎品咁多，真係抽都抽到手軟，但見到每位得獎者都好開心好投入，令整晚嘅氣氛都非常之熱鬧。

今晚除咗要擔任司儀之外，自己亦唱咗三首歌，分別係「甜蜜蜜」、「月亮代表我的心」，以及同Tommy合唱「愛在心內暖」，反應都算唔錯。另外一位歌手亦係Celia嘅拍擋 Stanley，之前佢都有幫安基宛表演過，所以佢話自己同d街坊係老朋友。節目大約十一点鐘完結，自己覺得表現都唔錯，而主席亦有加以讚賞，開心！

其實今年中秋好多地方都有搞中秋晚會，除咗今晚之外，下星期五同再下星期一自己都有表演。計番起原來自己參予這類演出亦已經差不多一年，真係古語有云：「一年容易又中秋」，就此預祝大家「家好月圓，人月兩團圓」。