全港搖搖公開大賽2008司儀

不經不覺已經寫咗網誌一年多，期間認識咗好多朋友，當中包括咗Celia，而自己今日就去咗幫佢做「全港搖搖公開大賽2008」嘅司儀，比賽一連兩日喺杏花新城舉行，今日係初賽而明日就係決賽。

同Celia都係第一次合作，司儀方面嘅技巧重要跟佢學習。另外，自己對搖搖比賽亦唔太清楚，好彩大會都提供咗好多搖搖嘅起源同歷史俾自己參考。這個比賽今年已辦到第四年，而今次比賽都分開好多組別，包括咗自由花式離手組、自由花式離繩組、自由花式雙手組等等，而部份參賽者更來自內地，一班年青人嘅表現的確出色，相信佢哋為咗今次嘅比賽亦下咗好多苦功。

今次比賽嘅評判團除咗香港搖搖技術會嘅代表之外，大會特別喺日本請來兩位高手，分別係「飯田健一」先生同「鈴木」先生，佢哋都參加過世界賽而又羸過獎項嘅朋友，有佢哋坐陣的確令這個比賽生色不少。

今日因為有事未能跟足全程，不過都係一個唔錯嘅經驗，希望日後同Celia有更多合作嘅機會。

聖安多尼堂「第二屆明日之聲流行曲歌唱比賽」決賽

今晚係聖安多尼堂主辦「第二屆明日之聲流行曲歌唱比賽」決賽嘅日子，我哋依時四点鐘到達。採排後，大會安排咗食物俾參賽者享用，值得一讚。

比賽喺大約七点四十五分開始，而評判團方面，首席評判係 Eddie Tang 鄧志和先生，佢係一位着名喺音樂人，現時係電視台嘅音樂監製，有「香港鼓王」嘅美譽；另外一位係 Leo Tsang 曾廣膺先生，佢係協辦機構 Singing Square 嘅校長，好多有参加開比賽嘅朋友都應該唔會陌生；第三位評判係羅寶欣小姐，佢係2002年全球華人新秀歌唱大賽香港區選拔賽亞軍嘅得主；而最後一位係梁晶瑩小姐，亦係聖安多尼堂嘅代表。

Tommy係第一個出場嘅參賽者，平時都算唱歌入咪嘅佢，今晚竟然俾d音樂聲完全蓋過佢嘅聲音，跟本發揮唔到自己應有嘅水準，唔知係唔係因為第一個出場d音响未完全tune好，因為最初連司儀嘅說話自己都聽得唔清楚，而教堂內嘅回音亦的確比平時比賽同表演嘅場地為大。

今晚比賽明日之聲組嘅爭持相當激烈，而最終都係由賽前大熱嘅王忠傑勝出，不過單看自選歌曲方面，其實高晨維嘅表現係最好，另外之前都經常攞獎嘅王凱欣亦都唔錯。

大會今晚安排嘅特別表演嘉賓係Kenny關智斌，佢唱咗兩首歌，而佢嘅粉絲團就一邊舉起閃燈 banner，一邊呼叫住自己偶像嘅名字，為全晚推至最高潮。

最後大會亦宣報比賽結果，Tommy攞到成人組嘅季軍，而今晚嘅賽果亦非常合理。我哋一出教堂就上咗架的士，司機叔叔好好奇問我哋点解咁夜喺教堂出面重咁熱鬧，我哋話係歌唱比賽，佢就話現代嘅「耶和華」真係越來越開明。今晚影咗好多相，但要等阿Chung send番俾我先可以 post上blog，就上住少少先啦。