「世界防癆日」展覽暨健康嘉年華會2008

早前接到防癆會電話，邀請我哋參予今日喺紅磡黄埔花園舉行嘅「世界防癆日」展覽暨健康嘉年華會2008中表演。諗番前年參加防癆歌唱比賽贏咗冠軍，而當年嘅防癆大使兼比賽評判係Kellyjackie，一瞬間又過咗兩年，而今年又會有大型嘅宣傳活動。

今日嘅主禮嘉賓除咗有香港防癆會董事局成員外，大會重請到07年度香港小姐冠軍張嘉兒小姐、亞軍王君馨小姐同季軍周美欣小姐蒞臨參予開幕典禮。表演節目方面除咗我哋之外，另外重有魔術、話劇、跳繩同雜耍等七個項目，三位港姐要喺我哋之中揀出我最喜愛表演節目同最佳演出獎，結果兩個獎都由圓玄老人中心「嘉福村」嘅一班長者演出嘅話劇奪得。

我哋今日唱咗兩首歌，第一首當然係防癆歌唱比賽嘅得獎歌「防癆齊關注」，這首歌是改自容祖兒嘅「世上只有」；另外一首我哋揀咗「明日恩典」，因為覺得這首歌節奏輕快，好適合於這類活動中表演。

整個活動大約喺五点鐘結束，節目尾聲嘅時候再由我哋帶領所有嘉賓上台再唱出「防癆齊關注」這首歌，我哋亦接受咗大會頒發嘅紀念品。其實能夠出席今次嘅演出，我哋都感到非常之榮幸，而且今日又天公造美，亦多謝特登收工都來捧場同我哋影相嘅阿鍾。
 

Hotcha in Pizza Hut 魔法幻影之夜2008

上次同Janice食飯，佢話剛剛接咗Pizza Hut個Job叫「魔法幻影之夜2008」，12同13号一連兩晚喺九龍灣國際展貿中心舉行，問我哋有無興趣去睇，我哋當然一口答應，噚晚等埋Tommy收工，食咗少少嘢就過去捧場。

可能因為Pizza Hut嘅員工大部份都比較年輕，所以佢哋公司亦請咗近期熱爆組合Hotcha做表演嘉賓。當我哋到達現場嘅時侯，原來農夫剛剛表演完走咗，失望。同Janice打過招呼後，佢話Hotcha正喺後台standby，重帶咗我哋入去見佢哋。三個美少女(Regen、Winkie同Crystal)的確是青春無敵，原來Crystal今晚正抱病在身，不過三位一体嘅佢哋亦繼續落力演出，勁歌熱舞當然唔少得，當中亦有同Pizza Hut員工玩遊戲攪攪氣氛。

正當佢哋在台上表演之際，我哋喺台下見到李思捷，原來佢就係今晚嘅司儀。估唔到上次喺亞博個繽紛Show之後，咁快又可以見面，同佢真係有緣，當然要影番張相留念。

因為時間唔早，所以我哋大概只係逗留咗四十五分鐘就離開，不過真係要多謝Janice，希望佢公司嘅生意越做越好，咁我哋以後就不斷有Good Show睇啦！
 

青衣長安邨兒童綜合表演 + 保良局教育服務六十周年繽紛Show

噚晚放工後約咗前九鐵A&S Club嘅同事及Janice哋一齊去食日本菜，跟住去咗尖東唱K，返到屋企已經差不多成点鐘，今日又要去青衣幫Denis表演，晚上再去紅館睇保良局教育服務六十周年繽紛Show，雖然好攰但好充實。

青衣個Show主要嘅對象係兒童，所以多數以魔術同遊戲為主。我哋今日都係唱咗五首歌，Denis今次唔在場，可能佢覺得我哋已經可以應付得來，而Tommy亦有幫Bonnie同D小朋友玩估歌仔同猜燈謎，D小朋友一D都唔害羞，個個重爭住答問題，答中重有禮物收，幾開心！

做完個Show後食咗少少嘢就搭車去紅館，因為阿Chung係工作人員關係，所以我哋坐嘅位都算幾前。今晚請咗教育局局長孫明揚先生做主禮嘉賓，至於歌星方面有李克勤、泳兒、鍾舒漫、鄧健泓同鄭希怡；聽講本來應該有Twins份，但阿嬌近排負面新聞多，所以最後由克勤頂上。

所有歌星今晚都係每人唱咗一首歌，克勤聲靚唔洗講，泳兒都唱得好好，不過令我印象較深嘅反而係鍾舒漫，第一次現場聽佢演譯首快歌，真係唱得唔錯。其他嘅環節主要係頒發保良局教育方面嘅獎項予各學校同教師，另外亦有由同學同老師表演嘅節目，有D小朋友真係好細，佢哋天真無邪嘅童真，的確帶俾大家好多嘅歡樂。

今晚都影咗好多相，但要阿Chung send番俾我先可以update上個Blog，遲D先post番上嚟啦。

有相update。