東涌新春盆菜家庭聯歡宴

話說我哋上年參加咗由東涌商會主辦嘅卡拉OK比賽獲得冠軍，今日就應佢哋嘅邀請參予「東涌新春盆菜家庭聯歡宴」這個活動做表演嘉賓，當我哋到達東涌消防局旁嘅球場時大概係兩点半鐘，場內己經擺放咗五十幾張圓枱作食盆菜用途。

講起這個活動除咗商會出錢出力外，另外重同東涌鄰舍輔導會合辦，目的係讓東涌居民有一個共聚嘅機會，加強彼此之間嘅了解。另外大會亦邀請咗中聯辦、離島區議會同政務署嘅代表做主禮嘉賓，而我哋亦獲頒發紀念品作惠存。

今日除咗歌唱同樂隊表演外，另外重有醒獅、社交舞、中國舞同抽獎等等嘅節目，而自己都未試過喺下午三点半鐘咁早就開始食盆菜，不過可能之前已經食過午飯，所以到最後都只不過食咗少少，成盆盆菜足足剩咗一半，可惜！

今日同上個星期一樣，主打歌以賀年歌同舊歌為主，因為年長嘅人比較多。我哋一共揀咗四首歌分別於兩節時間演出，而自己覺得今日嘅表現只係麻麻，不過可以同咁多人一齊食盆菜，又可以為東涌居民出一分力，感覺都好開心！
 

尖東百周年紀念公園流行音樂會

鼠年好快又到咗年初四，今年周圍嘅氣氛都好熱鬧，加上成個假期嘅氣温亦徘徊喺十度左右，打破咗香港有史以來最長發出寒冷天氣嘅紀錄，為今年加添咗好多新年氣氛。

今日答應咗幫Denis表演，地点喺尖東百週年紀念公園，自己同Tommy準備咗五首歌，分別係「你最紅」、「歡樂年年」、「花好月圓」、「前程錦繡」同「 明日恩典  」，全部都係賀年同好意頭嘅歌曲。衣着方面，由於係户外場加上天氣凍，厚厚嘅綿納真係可以大派用場，因為佢既保暖又應節。

除咗我哋之外，Denis重揾咗Melody同區耀國參予演出，而今次亦係我哋第一次合作。Melody揀嘅多數都係容祖兒嘅歌，聽得出佢都係時時有出來表演，Bonnie話佢重係一位唱作歌手，年紀少少就這樣有才華，佢最後唱自己首作品「要求高」都唱得好好聽。致於區耀國係亞視「未來偶像爭霸戰」嘅金咪獎得主，可能年輕一輩嘅朋友對佢會比較陌生，不過自己覺得以前嘅歌手多數都係實力派，我哋當然唔會放過偷師嘅機會啦。

今年到目前為止都好開心，因為已經接咗好幾個表演活動，下個星期東涌商會又邀請我哋去表演同食盤菜，因為上年我哋贏咗佢哋卡拉OK比賽嘅冠軍，唔通今年真係我哋嘅表演年？

最後多謝Denis今日封利是！