萬家歡樂齊賞月–嘉福村中秋晚會

今晚去咗粉嶺嘉福村做萬家歡樂齊賞月中秋晚會嘅表演嘉賓，因為大會驚會落雨，所以將原本嘅場地搬咗入一間小學嘅禮堂入面，但最終天公都造美，並無落雨。自己同Tommy大約九点鐘去到，在場大概有二佰幾人，多數都係附近屋村嘅街方。

這類晚會少不了有魔術同唱歌表演等節目，而我哋就準備咗四首歌，兩首獨唱，兩首合唱。可能因為屋村嘅居民多數都鍾意聽一D舊歌，而我哋嘅歌又比較新，所以日後揀歌方面一定要注意一下。Denis重俾咗D意見我哋，話以後可以準備多一D唔同類型嘅歌，以便唔同場合嘅唔同需要。

其間，Denis又問Tommy有無興趣做埋司儀，因為佢覺得現在做show，唔可以單單靠唱歌，一定要唱得又講得，先可以有較大嘅發揮空間。而Tommy身形又比較高大，可以壓場，如果再train多一D時間同出多D show，日後一定會有進步。

好快又到咗晚會結朿嘅時候，Denis約咗我哋下個星期食飯再詳談。總結今晚嘅表現，感覺完全唔似平日嘅歌唱比賽，重有好多嘢要學習。不過Denis真係教咗我哋好多嘢，而我哋亦都好多謝佢嘅賞識。

好同事仔仔嘅婚宴

剛剛過咗果個星期日即係9月23号係一個大好日子，因為當日係我嘅好同事Louis仔仔嘅新婚之喜，地點係北京道一號王子飯店，果到嘅環境、招呼同食物嘅質素簡直一流。當晚亦都係我第一次做婚宴嘅MC，而我嘅partner係Louis嘅千金，我哋之前並無夾過，因為佢係21号晚先返到香港，不過整個過程都算順順利利。喺到 post 一D當晚嘅靚相同大家分享下先。

兩鐵儲社同樂夜

今晚好榮幸能夠作為兩鐵儲社同樂夜其中嘅表演嘉賓，地点係旺角倫敦大酒樓，延開五十席，氣氛都好熱閙。兩鐵各派兩男一女演出，大會請咗羅敏莊做MC；上年公司Annual Dinner都請過吳國敬同佢做表演嘉賓，今次見番佢份外親切。至於歌星方面就有殘酷一叮嘅台主(馮文樂)，佢模仿校長譚詠麟、李克勤同徐小鳳唱腔的確有一手。另外，Production House重請咗兩個「港男」同羅敏莊伴舞做Opening，一首「今晚夜」打嚮頭砲。

我同Tommy代表九鐵社第一隊演出，我哋將首歌嘅台風改良咗些少，總算獲得台下唔少嘅掌聲。跟住Ginger同地鐵嘅朋友亦相繼出場，最後六個人要唱番克勤唱嘅合併歌，首歌大家只係夾過兩次，效果都算不過不失。

接住有馮文樂出場，我哋都有一齊出去同佢近距離接觸，Tommy重有幸同佢 jam 咗幾咀，跟住佢同羅敏莊見大家都玩得 high high 哋，於是就落台走全場同大家握手，大家都玩得好開心。
晚宴接近尾聲，Production House 嘅 Managing Director (Denis) 突然走埋我哋張枱，問Tommy同我有無興趣係出面表演，佢攞咗Tommy個聯絡電話，又俾咗佢嘅卡片Tommy，重話星期二有個中秋晚會嘅演出係粉嶺，有興趣就明天call佢。星期二晚要同Tommy屋企做節，現在重考慮緊！ 算，明天再打算。
噚日終於覆咗 Denis，決定將食飯嘅時間提早，畢竟這類演出都好難得。Denis 叫我哋準備三至四首歌，現在重揀緊用邊幾隻歌，唔知明晚會唔會落雨？有D緊張tim！

『迎國慶-相會在東涌』卡啦OK大賽決賽

今日係『迎國慶-相會在東涌』卡啦OK大賽決賽嘅日子，三点半要入到東涌逸東村，去到嘅時候製作公司正準備緊個舞台。可能因為時間遲咗嘅關係，原先嘅綵排同試音都cancel咗。

比賽分青年組同公開組，青年組五個，公開組十隊。今次都幾好彩，公開組排最尾。比賽於露天廣場舉行，幸好今日嘅氣温都唔算太熱，有時重可以入商場過冷河。

期間大會邀請嘅嘉賓亦相繼到場，可能因為係迎國慶嘅活動，同時亦係東涌商會主辦，嘉賓之中有代表商會嘅立法局議員、新界總商會主席同中聯辦代表。

好快所有參賽單位都唱完首自選歌曲，而今日Tommy同自己都覺得唱得唔係太好，其實應該重可以唱好D。成績好快到咗MC手上，公開組宣報完季軍同亞軍之後，MC叫大家估下誰是冠軍，台下竟然有人叫我哋嘅number，結果MC真係宣報我哋係冠軍，心裡面只有開心、開心同好開心嘅感覺，因為今次嘅比賽除咗有獎狀之外，另外重有獎金架！接住自己就跟Tommy上台領獎，最後更加再演譯多一次得獎歌曲。

今日真係一個非常開心嘅日子，能夠將佢寫係自己個Blog到，為將來留下一個美好嘅回憶。